GeoVS yn derbyn buddsoddiad o £250k ar gyfer technoleg danddwr mewn marchnadoedd olew a nwy

20/07/2010

Mae GeoVS, cwmni a ddeilliodd o Brifysgol Morgannwg, wedi sicrhau buddsoddiad ecwiti o £250,000 gan Cyllid Cymru i barhau i ddatblygu ei lwyfan meddalwedd delweddu ac efelychu 3D ar gyfer defnyddiau morol a geo-fodelu yn cynnwys cynllunio tanddwr, mordwyo a rheoli traffig llongau.

Bydd y cwmni cyfnod cynnar, sy’n seiliedig yng Nghaerdydd, yn defnyddio’r buddsoddiad i arddangos y defnyddiau ar gyfer ei dechnoleg 3D o fewn y diwydiannau olew, nwy a morol ac i fasnacheiddio ei gynnyrch meddalwedd 3D yn llawn.

Wedi’i sefydlu ym mis Chwefror 2009 gan yr Athro Christopher Gold a Dr Rafal Goralski, sy’n arbenigwyr mewn geoddelweddu 3D, mae technoleg GeoVS yn trosi mapiau neu siartiau’n gyflym i fod yn ddelweddau neu fodelau 3D, gan roi gwybodaeth ar y pryd i ddefnyddwyr sy’n hollbwysig ar gyfer nifer o ddefnyddiau megis mordwyo ar yr wyneb a thanddwr ac ymwybyddiaeth sefyllfa o amgylch harbwrs a llwyfannau yn y môr.

Mae’r dechnoleg yn rhyngweithio’n rhwydd gydag amrywiaeth o galedwedd ac yn ei gwneud yn bosibl trafod yr amgylchedd ar y pryd, gan ddefnyddio rhyngwyneb rhyngweithiol ac ergonomig iawn i’r defnyddiwr, i drosglwyddo gwybodaeth yn gyflymach ac yn gywirach. Mae hyn yn lleihau camgymeriadau ac yn cynyddu effeithiolrwydd diogelwch a gweithredol.

Dywedodd Ann Casey, Swyddog Gweithredol Buddsoddi Cyllid Cymru: “Fel cam cynnar, cyn-refeniw, mae GeoVS eisoes wedi datblygu ei dechnoleg arloesol. Mae’r cwmni wedi denu cadeirydd profiadol, gyda ffocws diwydiant sydd â dealltwriaeth glir o’r potensial marchnad ar gyfer ei gynnyrch. Mae Cyllid Cymru yn awyddus i fuddsoddi mewn cwmnïau cyfnod cynnar sydd â chynllun busnes cadarn a gall fuddsoddi cylchoedd ychwanegol ar yr amser cywir.”

“Roedd GeoVS angen buddsoddiad ecwiti o £250,000 i sicrhau safle marchnad rhyngwladol cryf i dyfu ohono,” meddai Alastair MacDonald, Cadeirydd a Rheolwr Gyfarwyddwr GeoVS. “Mae’r cwmni eisoes wedi datblygu cysylltiadau cryf gyda darpar gwsmeriaid a disgwyliwn fod yn masnachu’n llwyddiannus erbyn mis Hydref.”

Ychwanegodd MacDonald: “Bydd y buddsoddiad gan Cyllid Cymru yn galluogi GeoVS i gwblhau gwaith datblygu pellach a bydd yn sicrhau fod ein cynnyrch a thechnoleg yn parhau i arwain mewn technoleg delweddu 3D ac yn gydnaws gyda’r datblygiadau diweddaraf o fewn y sector technoleg gwybodaeth.

“Yn y cyd-destun olew, nwy ac ynni adnewyddadwy, mae manteision cynnyrch GeoVS yn golygu y gall ffermydd gwynt yn y môr gael eu cynllunio’n gyflym ac effeithiol, y medrir efelychu prosiectau yn y môr a dynodi, gwerthuso a dileu’r risgiau cyn costau cynnal prosiectau’n go iawn, ac y gall cerbydau tanddwr yn awr weithredu mewn sefyllfa lle na fedrir gweld dim bron, eto bod mewn sefyllfa ddiogel yng nghyswllt yr holl gyfleusterau tanddwr y maent yn gweithio arnynt.

“Mae gennym hefyd geisiadau a chynnyrch technoleg dilynol yn yr arfaeth i sicrhau twf y cwmni.”

Nododd Dr Rafal Goralski, y Cyfarwyddwr Technegol: “Mae’r meddalwedd craidd yn ddatblygedig iawn, ond mae’r systemau yn wirioneddol rwydd eu defnyddio a medrir defnyddio’r buddion yn rhwydd mewn marchnadoedd eraill megis systemau rheolaeth traffig llongau ar gyfer porthladdoedd a harbyrau ac i gynorthwyo mordwyo i longau ar yr wyneb, llongau tanfor a cherbydau awyr di-griw.”

Buddsoddodd Cyllid Cymru £5.75 miliwn drwy 30 buddsoddiad cyfnod cynnar yn 2009-10. Mae cyfanswm buddsoddiad uniongyrchol Cyllid Cymru ym musnesau Cymru yn fwy na £157 miliwn ar hyn o bryd a wnaed drwy 2400 buddsoddiad ers 2001.

Dywedodd Doug Hampson, Rheolwr Deillio Masnachol Prifysgol Morgannwg: “Roedd yn wirioneddol gyffrous cynorthwyo’r ddau ymchwilydd hyn, sydd â gogwydd masnachol, i ddatblygu cynnyrch yn seiliedig ar 10 mlynedd o ymchwil. Fe wnaethom i gyd ddatblygu ein sgiliau’n sylweddol wrth lunio pecyn gyda phobl, technoleg a chyfleoedd marchnad a ddenodd fuddsoddiad gan Cyllid Cymru a Llywodraeth Cynulliad Cymru. Bu’n fraint gweithio gyda Alastair, Rafal a Christopher dros y 18 mis diwethaf.”

Y cynghorwyr ar y ddêl oedd Hugh James a Capital Law (cyfreithiol) a Douglas Westwood (diwydrwydd dyladwy masnachol).

Dywedodd Greg Williams, Cyfreithiwr Corfforaethol a arweiniodd y tîm yn Hugh James: “Rydym yn falch iawn i fod wedi gweithio gyda Cyllid Cymru ar eu buddsoddiad diweddaraf yn GeoVS, cwmni arloesol yn gweithredu yn y sector meddalwedd blaengar iawn. Mae’r sector wedi rhoi llif cryf o waith i’n cwmni er yr amodau economaidd anodd ac rydyn yn bendant yn ei weld fel marchnad allweddol ar gyfer y dyfodol.”

I gael mwy o wybodaeth ar GeoVS gweler www.geovs.com.

Ymholiadau gan y cyfryngau

E-bost: communications@financewales.co.uk

Ffôn: 029 2033 8126